Збирка од техничка култура
Техничката култура во музеите е важен дел од културното наследство на секое општество-таа претставува материјален и нематеријален доказ за технолошкиот развој, иновации и секојдневието на луѓето во различни историски периоди.
Во средината на 20-тиот век,техничката култура во Крива Паланка била тесно вплетена во традиционалниот занаетчиски и урбано-градскиот живот. Во ЛУ Градски музеј-Крива Паланка еден значаен дел од својата збирка е посветен токму на техничката култура-алатки и машини (стари машини за шиење, земјоделски алати, индустриски уреди), електронски уреди (радиоапарати, телефони, телевизори, грамафони), инструменти (мерни инструменти, часовници, оптички уреди).
Радио уред „Никола Тесла“
Помеѓу многуте вредни предмети може да ги издвоиме радио уред „Никола Тесла“ од 1956 година. Овој радио уред е производ на познатата фабрика „Никола Тесла“ од Загреб која била една од водечките електроиндустриски компании во поранешна Југославија. Моделот од 1956 година претставува класичен лампов радио приемник, дизајниран за прием на АМ и кратки бранови, и е дел од домашната електроника што се наоѓала во домовите на илјадници семејства во Македонија и пошироко. Уредот е карактеристичен по висококвалитетниот дрвен корпус, стаклената скала со означени европски радио станици, и претставува симбол на модернизацијата и комуникациското поврзување со светот во поствоеното време.
Грамафон на батерии
Грамафонот на батерии од 2/2 на 20 век кој претставува рана форма на звучна репродукција достапна за пошироката јавност. За разлика од класичните грамафони со куќна струја или пружен механизам, овој уред бил напојуван со батерии, што го правело иновативен за своето време и идеален за користење надвор од домот. Грамафонот користел 78-вртењски плочи, кои се репродуцирале преку игла поврзана со звучна труба и за времето претставувал револуција во преносот на музика,овозможувајќи слушање на народни песни, класична музика и говорни плочи во домашни и јавни услови. Денес, ваквите апарати се ретки и колекционерски вредни експонати,кои го претставуваат почетокот на масовната култура и личната консумација на музика во 20 век.
Телевизор ЕИ-Загреб
Телевизорот ЕИ-Загреб од 1960 година е еден од првите југословенки произведени телевизори, наменет за пошироката публика во периодот на технолошкиот подем по Втората светска војна. Производ на Електронска индустрија-Ниш,овој уред бил симбол на модерниот живот и почетокот на телевизиската ера во Македонија и Југославија. Овој црно-бел модел имал рачен избор на канали и механички регулатори за јачина,контраст и вертикална синхронизација, честопати поставуван на посебен дрвен држач претставува социјален феномен-сведоштво за времето кога телевизијата почнува да го обликува секојдневието, информацијата и забавата.
Апарат за копирање фотографии
Апаратот за копирање фотографии „P 20 Wakshaw-Krokus 442“ претставува класичен аналоген апарат за изработка на фотографии од филмска лента. Користен од крајот на 1960-тите до 1980-тите во училишта,фото-студиа и аматерски клубови,уредот бил составен дел од темните комори за фотографија.
Машина за пишување UNIS
Машината за пишување UNIS е југословенски производ на фабриката Универзал (UNIS) од Сараево, со механички систем на чукчиња,служел за канцелариско,административно и образовно пишување, и бил присутен во државни институции,училишта и домови. Иако денес е технолошки надмината,останува важен артефакт од ерата на аналогната комуникација и писмената културата пред дигитализацијата.
Поголем дел од предметите од збирката техничка култура се подарени од наши сограѓани, и изложени во поставките на музејот сѐ со цел да се зачува традицијата на народот. Денес, овие уреди се сметаат за техничко и културно наследство,а нивното присуство во музејската поставка потсетува на една ера на транзиција-од тишина на селата и градовите, до првите звуци на вести,музика и гласови од далечни краишта.
Со презентирање на технолошките предмети, музеите не само што ги зачувуваат самите предмети-туку ја раскажуваат приказната за човечката иновација, адаптација и напредок низ времето. Тие овозможуваат увид во развојот на индустријата, комуникациите, занаетите, претставуваат огледало на животниот стил, вредностите и комуникацијата на едно време, ги едуцираат младите генерации и воспоставуваат врска меѓу минатото и денешниот дигитален свет, ја раскажуваат приказната за човечката иновација адаптација и напредок низ времето.